圖解地產:新界南寓言:將貨櫃碼頭變公屋之城

筆者認為最需要城市重組就係新界南,可惜最難重組又係新界南。

新界南過去曾被規劃作工業城市,因此係葵涌起左個貨櫃碼頭,區內好多平地都用晒去起工廠,而周邊的高地如上葵涌、葵盛、荔景等就起公屋去大量安置勞動人口,但係依家香港都無乜工業可言,工廠都搬晒番內地,剩下來的工廈一係一早重建晒做住宅,一係就轉型做迷你倉或者寫字樓,於是就搞到住宅隔離就係工廠咁古怪。

除非有大塊土地作緩衝區,否則新界南就好似港島東一樣變來變去都係工廈變商廈或住宅,港島東就話柴灣已經過左維港範圍有機會填海,成個荃灣、葵涌同青衣的海面都係被海港保護條例限制不能填海,那麼地從何來?

最有潛質的土地儲備就當然係貨櫃碼頭,以前就話起近工廠區容易上落貨,依家貨櫃車都係經高速返內地上落貨,再擺個貨櫃碼頭係市區邊緣似乎係製造問題如塞車、光害和空氣污染多過保經濟增長。

那麼搬去邊好?青衣西岸同大嶼山係一個好選擇,既遠離市區又起好晒交通配套,咁樣市區就可以騰出一塊成個青衣市咁大的地方來發展。

騰出來的地方,筆者又有一個大膽建議,就係起一個公屋之城。現時公屋起到山卡拉咁遠的話,好多輪候人士都不願搬去住,搬入去住返工行街時間、車錢成本高昂令人減低外出意慾,兩者對社會都唔係好事。

係現時貨櫃碼頭位置起公屋,本身位置適中,返各大商業區都就近,輪候者嫌棄的機會會減少,最重要是可以大規模地舒緩公屋輪候者的,減少社會對住屋的剛性需求,某程度上都係壓抑樓價的一個較技巧。

從樓價角度分析,公屋密集地區對周邊私樓價格都係帶來負面影響,與其插針起公屋或者盲搶地亂咁起,不如有系統地收集大塊地黎起,管理都容易一些,反正葵青區公屋比率已是名列前茅,唔爭在要多一點吧。

延伸閱讀:

http://hk.finance.yahoo.com/blogs/tokuhon/城市結構大重組-八-新界南-033955075.html

將貨櫃碼頭變公屋之城

作者網誌:http://www.ccomentary.com

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: