小混混傳(2):到CEO 之路:面試

Ad

career02

這日,我提早了到逹「未來老細」位於荃灣的總公司附近, 對天生路痴的我來說,迷路基本上乃指定動作,所以一般時間都會預得較寬。看看腕上的精工錶 (窮到燶,戴精工),還有半小時,正好去喝杯咖啡醒醒神。

沙士的恣虐,導致許多公司玩「彈弓手」,原來的招聘計劃都暫停了,更甚的是簽了合約的都作廢,情願賠一個月錢了事。這種惡劣環境,使我更加珍惜本來就不多的面試機會。 我邊喝著那杯double espresso,邊簡單的整理一下思緒 — 這間位於深圳二線區的布廠,大概有二千員工,這次招聘的是例牌的 Management Trainee,經過第一輪筆試及面試後,了解到大概應主要負責客戶日常的溝通及事務,即所謂的 Account Management 或 Sales Executive 的工作,叫做開正我果項。

對手呢?? 理工有不少的入圍者,他們都對布料有專業的認識,最少較我專業吧,鬥專業又係死,待會要針對溝通能力及即時解決問題兩方面出力,一於學劉華話用誠懇有禮的態度出擊吧。

我對著鏡子再三檢查,確保自己的口罩戴得對稱,領帶沒有搞反, 鞋帶綁好,褲鏈拉緊,OK. It’s show time !
* * * * * *

狹小的空間內,坐著十一個人。三個主考,八個應徵者,我們好像在玩一個死亡遊戲,大家都被要求戴上口罩,看不到樣子的情況下,只能用那像被處理過的聲音作為武器,互相撕殺。

主考A 大叔近乎隨口up地說「請各位講下自己的優點和缺點吧」

又是優點缺點…….可以給少少新意嗎?

肥仔搶先發難,每次group interview 基本上都會有呢類唯恐執輸行頭慘過唔中六合彩的木咀,由你慢慢講。

「我認為係今日呢個競爭咁激烈的商業世界,一個新入職者最重要的是盡快融入公司的文化,為公司尋求最大利益….. 下刪二百字」

「OKOK,下一位,時間關係,請盡量精簡d」主考A大叔的金絲眼鏡下,不禁露出半分「你條肥仔都九唔搭八」的神色,剛好被我補捉了。

如是者一位接一位的,優點都係行貨野啦,但最過癮係,自從第三位發言人斯文友講了一句 :

「我覺得自己最大的缺點係太追求完美,有時會為自己做成一d 壓力,不過我平日都會做下運動黎減壓」

眾人即好像考試途中去廁格時執到 model answer 般,屎都跟,結果連斯文友在內,有五位同學仔的答案是一式一樣的,只是將運動換成聽音樂/看電影/看書等等…….細眼向三位主考偷望,我發現他們要麼眉頭深鎖,可能奇怪香港突然多了這麼多完美主義者,要麼就忍笑忍到面紅紅,差在未標眼淚水。

終於到我了, 雖然勉力收斂了笑容,但我骨子裡的傻勁還是爆發了出來,把劉華精神拋諸腦後了。

「或者我先講下自己的缺點啦,我個人冇乜方向感,一向好易蕩失路,所以都會預早少少時間到,不過就唔會做成太大壓力,因為我個人唔會太要求完美,只要準時就得」

主考 B 靚女此時終於忍唔住 「嘰」的一聲笑左出黎,你可以想像果幾個candidates 的面色有幾黑,斯文友更加向我怒目而視,我道行高,話Q 之佢,接著道出我的優點,不過費事玩太盡,都係交下行貨算。

接著一輪又一輪的問題,大家都用盡渾身解數,畢竟理大的高材生們都不是白唸專業的,我只好避重就輕,主攻business common sense ,如一般客人幫襯你必定會問的cost,terms,delivery,after sales service 等等大造文章。

好快一個半小時的group interview便完結了,眾人散去後,我剛小解完,便接到電話,原來是成程保持緘默,坐在中間的主考C。

「有冇時間傾兩句? 我仲係面試果間房」

聽到句咁既野,就算係傻仔,都知道今次掂左九成九了,即刻轉身九秒九跑番去,好彩急忙下都記得拉褲鏈。

一如所料,主考C 像白韻琴盡訴心中情般,話in 人好辛苦,難得一日聽到個笑話云云。又與我好認真探討我對工作有什麼期望,最後佢問左一個問題「其實你點睇返大陸做野?」

呢d closing 位,我梗係抖擻精神,食糊啦~

「哦,其實每樣野都有好同唔好,做一個決定,視乎好處係唔係多過壞處。試問有邊個唔想搵份人工高,福利好,又唔多洗做,最好公司係樓下,中午仲可以返屋企食飯的工丫? 不過世事梗係無咁完美,返大陸做野就預左見少左屋企人同朋友,亦可能會有d 悶,不過我相信學到0既野同得到的經驗,應該會遠遠比失去的多」

主考C一個滿意的笑容, 隨即派左張卡片給我, 叫我認真d同老母傾下先再覆佢。

我呆立兩秒,乜家下返工都要問過阿媽先得?

不過,不消兩日我便知道佢個笑容背後的深意了……..

%d bloggers like this: