置業信箱:青衣樓應否賣走

本人住在青衣(已補價)青華苑 420萬市值,今年1月有幸拜讀諗sir 網誌,youtube,及買了樓換樓來看, 深感獲益良多,小妹同丈夫都想將現有居屋1生2宅換成私樓,趁現在居屋高價可換取一筆資金。本身因身體差想工作多3-5年就計劃養老,醫藥費及欠債也致每月清,計劃賣樓後淨400萬,先在荃灣買1宅預算400萬樓自住,如麗城花園、荃景圍一帶。我應否棄青衣而換荃灣? 那區有前景?

早年看中灝景灣,但可惜識睇樓市時已太遲追不了。而家去荃灣買樓都冇可能入萬景峰這些較好的單位。

可是現見居屋已升破頂,而青衣交通尚算方便,管理費低, 青衣或許能受惠港珠澳大橋機建,而政府好像又有一系列幫人買居屋之措施,我們應否等大橋起好時才放售? 但到時又擔心政府多起居屋,二手居屋應會回落…諗到頭都爆,真係唔知而家是否賣走居屋好時機?

我們見識少知識少,不知我們財力是是否可行上述換樓方案?
兩公婆共人工: hkd33,000
3年後可每月供: hkd5,000(頭3年月供都要在賣樓資金中抽來用)

知問題太多,唔該指引下我在區份(青衣 VS 荃灣)、時機? 及 財力是否合適這些蠢問題

蠢人上

答案

每個家庭都有不同的換樓理由,不過目的都係一個環境上的改變,例如因為家裡多了新成員而需要細屋搬大屋,退休想套現多點現金而大屋搬細屋,想方便工作而靜區搬旺區,想環境寧靜一點而旺區搬靜區,假如換樓後的居住條件相若,就最好一動不如一靜,因為一買一賣駛費都唔少,不值得。

就青衣和荃景圍來講,兩者的硬件質素相若,都是一個成熟發展的地方,400萬左右的物業都是中小型單位,樓齡30年以上的舊樓。想買質素好一點的單位,恐怕要把預算提高至600萬以上才可以買到,對很多家庭來講都頗吃力。

至於港珠澳大橋對香港的經濟效益,筆者只認為對東涌有最大幫助,其餘地區的助力則相若,因為東涌因應港珠澳大橋而大興土木,成個大嶼山北部都將會有翻天覆地的變化,即係話東涌社區將會大幅改變,這樣才會有大幅升值的機遇,相反其他地區未聞因港珠澳大橋興建而有大幅改變,咁既然無改變,又何來機遇呢?

政府過去為樓市做了很多事,但樓價都沒有如願下跌,就算多起居屋,每次都超額十幾廿倍,真係多多都唔夠賣,擔心多起居屋會影響居屋銷情是不必要的,反而要關注香港的資產價格會否因為美元強勢而下跌就真。

讀者打算3-5年後退休,還要應付醫藥費等開支,應該留多點錢傍身,還要減少不必要開支。例如一買一賣層樓,又要俾經紀佣,又要俾印花稅,隨時仲要裝修,但係由青衣換樓去荃景圍,無論居住環境同埋地區潛力都係差不多,咁樣換樓就屬於不必要開支了。

如果讀者想套點現金傍身,可以考慮把現址加按,假設套回200萬現金,分30年按揭都係月供數千元,又可避免不必要支出,最重要的是,無需重新適應新環境,全心全意養好身體,才是此刻無價!

青華苑

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: