置業信箱:東涌定大圍 ?

本人資料

年齡:38歲男

自住第一城,有一間大圍樓收租

月入:$42500每月/ 已不會再升。太太月入$16000

小朋友5歲。未知小學係邊。不過冇能力負擔名校網

最近,東涌新地樓東X開賣,見平過同區,兩房約500萬,估計租金回報有16-18K,有少少心動想入市投資,等十幾年後可以自住(小朋友讀緊書都未必會入住因校網差),又唔知後市如何?

另外,自己有個大圍單位,兩房舊樓,市值近500萬。大圍呎價真係升得好高,點解?換樓由大圍至東涌好嗎?

目標:除自住外有兩個物業收租,每月有正現金流(一生三宅)

答案

筆者認為未來幾年樓市是要持保守的心態,讀者反正都已有一層樓收緊租,距離人生目標,即係一生三宅都係買多一層樓的事,當然唔急於叫讀者立即買多間完成目標,反而係趁市好,將質素無咁好既資產賣走,換入又新又有潛力的資產,正所謂進可攻,退可守。

大圍呎價升得高,因為成個地區受惠馬鐵通車,又有名城、溱岸8號、壹號雲頂等新樓入伙帶左批中產人士住入大圍,唔信可以睇下見証大圍成長的大圍村同田心村,多左幾多特色食肆就感受到了。至於大圍未來可唔可以食多浸沙中線通車帶來既機遇令到樓價再升上去,筆者就有點保留,第一歷史故事「曹劌論戰」都有講過「一鼓作氣,再而衰,三而竭」,有些因素由無到有,代表社區進化到一個新規劃,但係已有的東西再改良,只係改善工程,最多幫到少少忙,而且所謂改良也不一定,例如大圍新增了人口,但係成個社區其他設施無大改善,代表居住環境比以前差了。可以咁講,讀者已賺盡大圍社區進化帶來的升幅,與其想食過翻尋味,不如換樓換地區好過。

讀者問大圍同東涌好唔好,咁兩者相比之下東涌就有一鼓作氣果種爆升潛力,講緊的是東涌的商業價值,因為未來幾年,東涌會由機場旁邊一個住宅為主的新市鎮,隨著港珠澳大橋通車,變成珠三角地區既交通樞紐之一,政府又開晒口要發展東涌同埋大嶼山,成個大嶼山北部都會大幅度填海同發展,唔少得就係加入多個商業設施如機場的商業城,東涌東部都會有商業發展,十幾年後東涌既地位同商業價值肯定係現時的無數咁多倍,所以依家賣出大圍升左好多的舊樓,買入有折讓的東涌新樓,肯定係一個理想既換樓安排。

東涌定大圍

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: