置業信箱:富榮花園、荃灣新居屋及長沙灣的選擇

問:問:本人想以白居二買2房居屋,選擇如下:

1. 12月抽荃灣新居屋(優點:100%全新,住十年轉售比綠表客亦可易做30年按揭)

2. 大角咀富榮花園17年樓(優點:將來生小孩有校網油痳地天主教小學,近奧海城)

3. 長沙灣幸俊苑14年樓(優點:近阿媽,由細住到大)

希望可以指點小女子迷津,不勝感激

幸俊苑

答案

或許讀者少留意筆者的文章,筆者就賣下廣告先,無錯,筆者是狠批居屋是搵笨的東西,因為居屋是不能加按、放租,即係只有居住價值,而沒有投資價值。不過又咁講,有好多朋友真係一心想買間屋長住,又唔鍾意同銀行借錢,咁樣一間實而不華的居屋又係較為適合的。

睇下報章大小分析都知道,以白表申請新居屋,就算是抽到較前揀樓次序,都未必有揀樓機會,所以荃灣新居屋應該無需考慮,就算俾你揀到,都唔係最佳選擇,想知點解就要睇落去了。
剩下的選擇都係九龍市區,如果睇地區商業價值,就一定係富榮花園稍優,單是留意居屋成交,都知道富榮花園是九龍區的居屋王,樓價長升長有,再加埋個靚校網,除了油麻地天主教小學之外,屋苑附近都有一兩間直資小學都係出名的,咁樣比較法幸俊苑真係輸人又輸陣!答案很呼之欲出吧?錯了,筆者會推介幸俊苑!
筆者眼中幸俊苑有幾個少人提及的優點。

第一,三個屋苑中,幸俊苑最近港鐵站,仲要係筆者覺得最方便,班次最頻密的荃灣線!另外唔想坐港鐵的話,行出去長沙灣道就大把巴士搭,行去荔枝角道就大把紅VAN搭,選擇是最多的。

第二,幸俊苑附近有好多社區設施,單是泳池就有深水埗泳池,行遠幾步又有李鄭屋泳池,運動場也有室外的深水埗運動場及室內的長沙灣遊樂場。另外想出街食野,除了隔離幸福邨商場之外,行去青山道就成條街大把食肆,中西日糖水乜都有。講配套,齊過私人屋苑多多聲啦,仲要唔駛自費維護添!

第三,景觀方面幸俊苑是三個屋苑中最開揚的,因為南北兩面都係學校,西邊就係運動場,只係東邊將會由「開揚樓景」變成面璧公屋景,總好過荃灣尚翠苑望工廈望墳場,富榮花園西斜起卸區景、高速公路景同超近樓景啦。

最後也是最重要的,幸俊苑附近多塊土地已被規劃作公屋或居屋發展,再加上現時的幸福邨、長沙灣邨、元州邨,海皮的富昌邨、榮昌邨同埋海麗邨,成個長沙灣就變成一個新公屋之城,唔好以為咁樣係一件壞事,居屋的銷售對象大部份是附近屋邨的分支家庭,就好似讀者的情況,由細住到大,買樓都想買番附近。而幸俊苑附近咁多公屋居屋,即係代表未來有大量購買力,想換樓都唔駛憂少人搵而被壓價。

不過幸俊苑好似放盤不多,要搵岩單位是有難度的,要勤力一點睇樓先可望揀到心頭好了。

 

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: