梁隼樓評:買新樓攻略

筆者曾在《上車置業全攻略》一書中講過買新樓的四大攻略,不過時移世易,依家新樓受到一手住宅銷售條例所規範,又有3D辣招令到少左國內投資者入市,單位面積又只能用實用面積,無左所謂實用率高底問題,所以筆者又係度修改一下買新樓攻略,唔只咁,仲送多一個攻略俾大家參考。

 

攻略1:名牌大執位

新鴻基的物業仍然是信心保証,但大家有無留意新世界的物業質素也開始提升,筆者曾參觀過溱岸8號現樓,也參觀過溱柏的示範單位,發覺新世界物業的質素的確提升了不少。

信和樓的用料不錯,就算是市建局的合作項目如觀月・樺峰的用料也頗講究,至於其他發展商則分別不大,筆者就不予置評了。

 

攻略2:避遠期樓花

依家政府新例容許新樓地盤打好地基就可以推出發售,即樓花期最長可達兩年半,暫時筆者見到超遠期樓花仍然未係主流,不過兩年半真係咩野都可以發生,所以買之前就要注意兩樣野

1. 如選擇即供方式付款,就要預發展商未能準時交樓的風險,買樓時隨左要預供唔供得起之外,就要預埋未能準時交樓,要搵臨時住所的住屋開支

2.如選擇建築期付款,即交樓時才開始供樓,就要有到時樓價下跌,令到銀行估唔足價的風險,所以首期也要預多少少避免到時唔夠錢俾。

無論那一種情況都要預多點錢,所以最好唔好買太遠期的樓花,因為變數實在太大。

 

攻略3:買貨尾樓要留意

有部份發展商喜歡將D樓擺好多年先拎出黎賣,呢D單位好處就係即買即住,壞處就係無論水喉電掣就算唔用都會老化,附送的電器也如是,如恆隆的浪澄灣,原本白色的冷氣機都擺到變左黃色,但係發展商又唔會因為咁而平番幾萬俾你,即係話,附送的設備一係得物無所用,一係要額外花錢維修。

筆者有朋友幾年前抽到居屋油美苑,水喉就係長期養住水而生銹,令到食水長期有銹漬,至今多年仍然未有改善。據筆者朋友講,佢屋企的濾水器兩星期就要換一次濾心,可想情況有幾嚴重。

 

攻略4:比較發展商優惠

自從一手新例加3D辣招公佈之後,發展商賣樓再也不吊高黎賣,反而第一批仲會出齊各種優惠折扣去促銷,暫時見倒的有提早成交打折,即供再打折,成為發展商的club member 又有折,不過依家買樓厘印費都唔平,如果多一層樓渣手仲要俾雙倍印花稅添,有D發展商就再加多樣厘印費回贈去吸引投資客。

至於邊樣優惠最好,筆者個人覺得厘印費回贈較可取,因為樓價折左幾多都係數字遊戲,按揭供款並不差太遠,但係厘印費回贈可以降底買樓成本,買樓初期樣樣都係錢,將成本降底比較實際。

 

攻略5:圖則睇真D

依家所有新樓都無建築面積,只有提供實用面積,即係再唔存在實用率幾高的問題,但係呢個實用面積係由外牆起計,如果單位太多結構牆,或太多走廊位的話,都會令到個單位可用的空間打折扣。

此外近年的新樓已經唔可以將露台同工作平台連埋一齊,於是就將工作平台分開興建,但係又受制單位設計,好多工作平台都係起到又窄又長,就係傳媒戲言為棺材露台的設計,此類設計由於只能用掩門,真係有一半面積要預留做開門位,亦即是有一半工作平台的空間係睇倒用唔倒的。

所以買樓之前絕對要熟讀樓書,睇清楚心儀單位的細節,買錯樓都要守3年SSD才可轉手架。

 

露台

 

作者網誌:http://www.ccomentary.com

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: