梁隼樓評:2014年十大地產新聞回顧

今日係2014年最後一日,同文脫兄同周謙兄都回顧左香港同國際大事,noTcomment係一個地產財經網站,又點少得十大地產新聞回顧。

今年就由我,梁隼就揀左十樣野同大家重溫下啦!

10 辣招終於通過了
2月23日,辣招經過一連四日討論之後,再加埋政府打告急牌,另外還有22名泛民議員離席抗議下通過了,從此我地唔駛估估下,總之非本地人買樓就要俾15%買家印花稅,想買多間物業就要俾多一倍印花稅,不過係不明朗因素解除後,樓市仍然未有起色,直到之後政府改變雙倍印花稅豁免方法之後,刺激左有樓人士既換樓慾之後,樓市又再GOGOGO了
辣招通過

 

9 樓市成也長實?
正所謂一隻手掌拍唔響,政府落實雙辣招只係減少地產市場不明朗因素,要刺激起市民的置業需要,都要發展商減下價至得既,正如標題所講,長實係四月份推出深水埗的市區重建項目丰匯,雖然現時位置麻麻地,但係勝在平,最平個單位實用面積呎價竟然8,000蚊,五百幾萬就買到市區三房樓,於是就吸引好多人入票,結果402個單位好快就賣晒,長實之後乘勝追擊推出多個樓盤,連同發展商其他貼市價推出的樓盤都超額認購同好快賣晒。成個樓市即刻醒番晒!
Billionaire Li Ka-shing Attends Cheung Kong Holdings And Hutchison Whampoa Annual Results News Conference

 

8 港人港地正式講完
曾經被特首梁振英高調用作競選口號的港人港地政策,原來推出過兩幅啟德發展區土地作為試點之後,就無左下文了,今年4月,發展局回覆立法局議員提問果陣仲講到明現階段並無逼切性需要實施港人港地政策,即係好似當年的「八萬五」一樣,一早已經不存在了。不過又咁講,房協賣樓都係限制只係賣俾香港永久居民,呢D粗重野留番俾房協做好過啦。
港人港地

 

7 雙倍印花稅搬龍門
2014年6月,政府放寬雙倍印花稅條款,由以前簽臨約之後半年賣走原先層樓先可以豁免DSD,變成簽大契(樓契)後半年,即係唔再懲罰換樓人士,變相增加供應,希望藉此增加二手供應打壓樓價,可惜的是隨後半年的樓價發展就唔係政府所希望的。
放寬雙倍印花稅

 

6 H按又成為主流
市場上成日流傳美國加息,留港資金會流走,會對俗稱HIBOR的銀行同業拆息做成壓力,於是去年樓市轉勢果陣,買樓人士大多選擇無咁波動既P按,不過呢個形勢今年隨著美國仍然對加息得個講字,HIBOR 仍然低企之餘銀行再推H+1.7%的低息OFFER,計起上黎比P按平成0.25%,梗係轉番做H 按啦,結果根據金管局公佈既按揭統計,H按佔了8成以上,再次領導市場。
H按

 

5 界豆腐式增加供應
政府係多個場合都講到明好難搵地起樓,但係又係長遠房屋發展計劃入面開出10年起47萬個單位既期票,咁點好呢?原來又係用番小學教育電視既方法,將單位間細一點,咪可以起多幾間囉,例如日出康城就可以再起多4,000個單位喇,日後買樓,可能又去番八十年代,四百幾呎都可以做三房單位了。(沙田第一城咪有款建呎544, 實呎451呎既三房單位)
界豆腐

 

4 綠公仔延長兩秒,好威呀!
特首2014年度的施政報告提及,採納長遠房屋策略督導委員會建議,未來10年供應47萬個單位,當中公營單位佔6成。點知到了12月16日,政府再推出長遠房屋策略,調整未來10年房屋供應目標,由47萬增加到48萬個。其實講幾多個都係果句: 有無咁多地起先?定係又玩界豆腐,起多D一房單位填數?
交通燈綠公仔

 

3 細價樓爆升
今年樓市升得最勁的唔係豪宅(根據本網的18區屋苑樓價圖顯示,好多豪宅樓價去年見左頂了),竟然係放個屁都成屋臭晒既細價樓,無他既,400萬以下的樓仍然可以做9成按,樓價又無轉勢既跡象,唯有細細地買間上左車先講。
細價樓

 

2 中原指數破頂
代表香港二手樓價的中原指數年中突破去年高位之後接連破頂,到12月19日為止仲創歷史新高132.81點。
中原指數破頂

 

1 新居屋越彈越愛?
2016年入伙的新一批居屋係12月23日開放示範單位同埋派發申請表,由於間格係源於公屋則,參觀人士大多負評,不過批評還批評,因為售價便宜,最平個單位197萬就有交易,就算最貴都係324萬,326萬,係荃灣黎講,連立坊既244呎開放式單位都唔夠錢買(最新一單成交賣357萬),所以仍然大把人排隊拎申請表,真係要唱首吳若希既《越難越愛》贈下慶:無論世事變改,還是越彈越愛……
新居屋圖則

 

展望2015年,美國盛傳會加息,筆者大膽估計,如果成年都加唔過一厘的話,樓市係會繼續gogogo的!

 

作者網誌:http://www.ccomentary.com

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: