職場點滴:6%人

Ad

我記得小學時學校要用英文寫「我的志願」,結果我寫左”worker”, 因為小學生唔識得幾多個英文字,又唔想寫doctor、teacher之類咁老土, 小學生生活圈子上能夠接觸到的「工作」,可能仲有driver、actor之類,寫worker就最中性,咁worker工作係做乜呢? 小學生鬼知咩!其道理正如電視編劇寫黎寫去都係警察、黑社會、醫生、律師、教師之類,其他人做乜工作,鬼知咩!

讀左十幾年書,做左咁多幾年野,知道社會是動態發展,對社會任何靜態的觀察只會流於表面及片面。 點解幾十年前有漁農友會,之後有工會,又之後有專業團體? 就係因為社會的生產模式不斷改變,只有走到社會較前端的工作人士,才有可能享受到社會發展及繁榮的結果。

當中國最近開始出現城市人口多於鄉村人口,即是超過一半人口住在城市(先不論城市的定義,及城市內人口究竟做一些甚麼工作),而香港在過去廿年來製造業人口減少了一百萬,未來展望香港經濟的增長部份主要在那裏? 官方的講法香港經濟四大支柱是「金融業」、「貿易及物流業」、「旅遊業」和「工商業支援及專業服務業」。 2002年香港經濟的四大支柱行業合計, 增值額達6,410 億元, 佔本地生產總值53.2%; 提供的職位共有1 420 000 個, 佔總就業人數44.0%。趨勢上比重是有增無減。

工會領袖,是沒有可能不知道社會的發展趨勢,佢地指出運輸服務業出現實質減薪(即相對於名義增幅),所以的士要同客貨車紥馬,巴士司機要接受3%增薪;受惠的只有專業人仕、管理及專業人員,基層勞工一點也分享不到。

工資兩極化、企業壟斷、產業結構失衡、壓迫和剝削、貧富兩極化之類,我沒有好氣爭論是否屬實,就同情地了解為真。正如我一向所講,無論你用乜野美麗詞藻去形容一樣野,實然就是實然,應然只存於各人的心中,人人都有自己「應該」的世界,但無論點想法,都唔會成為現實。正如我希望人人都中六合彩頭獎,只要買就人人中六千萬,樹生不出天跌不下,想又如何?

蛋糕有餅底、蛋心、忌廉、櫻桃,如果想成舊蛋糕同質化,結果一係成舊都係蛋心,或者將成個餅打碎,結果似乜野樣?社會結構可以短暫地被人為地扭曲成人人「平等」,但人的個別差異就好似浪淘沙一樣,越大粒越有機會留低。我們作為個人,能夠做的只是盡自己的能力爭取較高的社會經濟地位(socio-economic status呢一句社會學罐頭名詞),對於現況欠理想的人,除了寄予同情之外,可以指路佢行,行唔行到各自修行。任何他人以力量將一群人提升,結果是另一群人跌落去填補佢個位,唔係邊個洗廁所執垃圾?有人講得好o岩,鼓勵人創業做老闆,咁誰人會打工?放一萬個心,總有一些人,中左六合彩幾年後都係一貧如洗。

工會領袖會唔會唔明白呢個道理?佢話唔明我都唔會信喇!人人都有維護一己利益的傾向,沒有人會在自己的飯碗上撒尿,要撒就撒在別人的飯碗上,或者佢根本就唔想要呢一碗飯,香港唔係有某一個領證工會領袖咁樣咩!

P.S. 最後,不能不提這句:

這個世上只有6%的人可以得到幸福,擁有權勢與財富。

──阿部律真矢《女王的教室》

女皇的教室

 

作者網誌:http://blog.tokuhon.org

About 脫苦海 (777 Articles)
業餘投資者,自2002年起在網上連載投資相關文章,著有多本投資及置業類書籍,以數據分析為本,從小業主的觀點,與大家一起透視樓市。 網誌:http://blog.tokuhon.org/
%d bloggers like this: