簡易入廚:豬腳薑之Q&A

豬腳薑

生BB之前2個星期左右開始整薑醋嘞。

原來籌備都有好多工夫, 用乜野煲啦, 去邊買薑啦, 用幾多醋啦…有問題又冇乜人解答到, 身邊d朋友又唔係自己整, 連阿媽同奶奶都冇實戰經驗, 所以我諗住將我遇過的難題, 寫個Q&A,等大家blog友可以睇下, 唔駛第日自己撞。

Q1: 要買幾多薑, 幾多醋呢?
A1: 呢個問題真係唔到食完都唔知夠唔夠。我要負責整阿媽送人的(5家親戚同5位朋友)同自己d朋友來訪的份量, 因為甜醋同薑的比例係2比1, 加上同珍要買夠得$300至送貨所以就暫時就買左30斤甜醋+15斤薑。

Q2: 要用邊種煲?
A2: 用瓦煲呢個就係must嫁啦, 煲醋唔可以用metal煲。康寧煲得唔得呢? 同珍教話用蓋有疏氣嘅煲d薑唔會因為焗住而變壞。康寧煲煲蓋冇疏氣, 要另外打開少少個蓋來保存, 好似冇咁方便。

Q3: 用邊種瓦煲?
A3: 瓦煲有平有貴, 分別在於是否所謂質素好高d 嘅高溫瓦煲。我原本諗煲果一次用平嘅($80-$100)就算, 買返黎放水入煲內, 墊煲張報紙濕左一個圈, 呢d用泥做嘅煲, 因為有氣孔, 所以有滲水都正常, 不過我唔想攪一大輪然後”出亂子”, 所以都係換左個貴d嘅高溫瓦煲。同第一間雜貨舖買要$225, 後來再添一個去第二間買, 只售$150, 款式相約…俾第一間搵了笨…大家真係要格好價先出手。另外我本來想用煲仔飯型的沙煲, 諗住好攪d, 但容量始終太細, 要好多個至得, 最後都係用高身嘅瓦煲。

Q4: 要幾大隻煲?
A4: 我買了2隻口闊11寸高14寸的, 可以放到滿滿30斤甜醋+15斤薑。要加豬腳時就要裝開用另一個煲了。

Q5: 薑要多少錢一斤?
A5: 我有朋友話深水埗的靚老球薑只售$5一斤, 但我去d時又唔見到$5一斤而靚的。最後都係去灣仔街市買$10一斤的。15斤薑就係兩大袋膠袋, 我老公一手一袋都算拎到。

Q6: 薑刮完皮要風乾幾耐?
A6: 近日天氣很乾, 刮好皮後我用4個筲箕放了2日風乾。

Q7: 薑皮點處理?
A7: 陪月阿姐話可以留用來煲水沖涼, 刮好後風乾放入密實袋待用, 不用放雪櫃。

Q8: 每日翻煲用幾多時間?
A8: 很耐…因為我用左個咁高嘅煲, 醋的份量很多, 而且又唔敢用太大火驚燶底, 所以每日用小火翻煲, 然而耗數小時的石油氣至見醋微滾, 滾3分鐘後才熄火, 非常花時間及能源。好彩有工人睇火同久唔久攪下。 我明日會開始用大dd火試下縮短時間。

朱太與你-我的煮飯日記
http://sandycookpad.hkblogcity.com/

%d bloggers like this: