實地睇樓:黃大仙物業投資通勝

獅子山下

梁隼先同各位讀者拜年,祝大家心想事成,事事順意,有求必應。講開有求必應唔知大家會唔會去黃大仙祈福拜神,順道求番支好簽。

黃大仙是否有求必應就見仁見智,不過黃大仙區確實提供好多公屋單位,幫好多人解決住屋問題,至於置業問題又如何?一樣有求必應是也,除私人物業之外,亦有唔少二手居屋、公屋可以轉讓,有唔少食地利公屋仲係港鐵站附近,樓下又有商場、公園、游泳池等,論居住條件好過私家樓好多好多,唔怪得有人寧願唔做野或減人工都想得到一間市區公屋啦。

黃大仙區住宅物業分佈都頗鬆散,幾個港鐵站樂富、黃大仙、鑽石山及彩虹都有住宅群,遠離港鐵站如新蒲崗、慈雲山、斧山及牛池灣也有不少屋苑,以樓價而論,無論公屋、居屋或私人屋苑都以港鐵站附近物業最高,然後隨距離越遠樓價就越平,可見交通配套是決定黃大仙區樓價的最重要因素。

此外又唔係有錢就可以係黃大仙區置業,因為好多已出售公屋、居屋單位都未補地價,以現時地價水平而言,補地價後的公屋、居屋單位隨時貴過私家樓,似乎唔值得咁做,剩下來的已補地價居屋同私家樓就樓齡偏高,早兩年熱炒細價樓又令到呢批舊樓升值不少,同樣不化算,剩下來的,就只有新入伙的私人屋苑如譽・港灣、現崇山及駿弦,不過又係比二手市場貴了一截,同樣難以取捨。

真係好鍾意住黃大仙區的話,除了現有物業外,又有無未來供應?對不起,本來有的,大磡村原址本來打算起私樓,後來嘈嘈下就變了公屋私樓各半,可是最後答案是全數用作公營房屋及居屋發展,即係話,除非有資格申請居屋,否則可以放棄以黃大仙區新物業為置業目標了。

那麼投資角度又如何?無論私家樓或公屋居屋都追突落後,價錢一點也不便宜,想投資本區現時應忍手觀望,待跌市過後再考慮也未遲。

 

作者網誌:http://www.ccomentary.com

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: