圖解地產:將軍澳寓言:康城不是尾站,寶林變成支線

「西貢」區的將軍澳與西貢其他地方格格不入,因為成個西貢都得三樣野:低密度住宅群、郊野公園、海灘,而將軍澳就係高密度住宅群、工業邨同埋堆填區。

西貢未來都無乜故仔可講,最好就唔好變,留番個景色怡人,遊山玩水的樂園俾香港市民,想住得接近大自然的,平價貴價村屋任君選掉,總之香港點都要一個後花園。

反之將軍澳就有條件及需求去擴容,當然前提係關閉個堆填區先。

位置上將軍澳對面係港島東,跨過座山就係東九龍,兩者都係商貿區域,商業價值儘管沒有中環、金鐘等,但係都有大量高增值職位提供,唔駛講到咁遠,剩係現時調景嶺站附近屋苑都住左好多人係觀塘返工(無需轉車+三個站就到)可見一斑。

不過將軍澳賣晒將軍澳南七幅地皮之後,就剩下百勝角果邊的地段有機會發展住宅,政府仲話起動九龍東,當九龍灣、觀塘的工廠地都悉數變晒商業大廈之後,寫字樓同職位多左,附近地區的居住需求都會提升,假如將軍澳都飽和的話就大件事了,不過唔緊要,將軍澳並非位於維港範圍,即係唔受到海港保護條例保護,絕對可以靠填海增加土地。

筆者就有一個大膽建議,就係由現時日出康城位置拉條直線出黎至對岸五桂山,直線範圍內的就可以填海,最多留番條坑令到坑口河唔會變成內湖。

螢幕快照 2013-12-25 下午10.21.43

至於新土地的交通配套,就可以由康城站再延伸至新填海區,並成為主線方便新填海區的龐大人口,現時的坑口及寶林站則變為支線。陸上交通方面,除將軍澳隧道外,也有已規劃的跨海大橋(可能到時變成天橋),相信也足夠應付。

新增加的土地,保守估計足有現時將軍澳咁大,也就是說,可容納多幾十萬人,假如政府有決心咁做的話,根本就沒有唔夠地起樓的問題,不過都預料有相當大阻力。

 

作者網誌:http://www.ccomentary.com

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
%d bloggers like this: