脫苦海講樓:炒樓活動局外人不易參與

炒樓

 

一般人想參與炒樓,恐怕是對此種經濟活動欠缺理解。股票流通量大,又有交易平台,資訊透明度牌面上較高(但最重要的街外人卻不知),同質性又高,故一般人去炒股票,吃虧的總算有限;但物業市場,尤其是二手買賣,局外人實難知內情。比如有朋友問太古站某屋苑最近有一單$5,500的成交,為甚麼這樣低?筆者這樣答:D座。

除了資訊不平衡外,炒樓的另一難是人脈,因為無論貨源或客源,均是操之於該盤經紀之手,尤其是一些地區如北角,連中美利港四大代理也要讓路給當地的中小行,而他們也依附於當區的炒家提供貨源。筆者在網上找到一篇描述「美孚師奶炒樓團」的文章:

http://hk.myblog.yahoo.com/yomagyomag/article?mid=494

美孚師奶兵團,個名已經錯左。第一,佢地唔喺師奶,得罪啲講句,你老婆就喺師奶,人地喺好有錢嘅資深投資者。第二,佢地唔喺兵團,佢地各自為政。最著名有林、黃、趙、李四位阿太,佢地每人手上長期有幾十件貨。由於佢地喺大客,兼買賣多,在美孚冇地產敢唔賣佢地賬;如果有平少少嘅貨,而唔賣俾佢地,嗰位sales都怕且要同佢地幾位好好咁講個合理解釋,如果唔喺以後嘅日子都好難過喇,大家可知道人地幾猛料。

久而久之,平嘢只喺賣俾佢地,就成為習俗;其實又唔怪得啲sales,因為佢地入貨決定快,銀紙多,價錢啱就幾乎永冇托手肘。你攞去賣俾第二個一定冇咁快、靚、正;轉吓頭,第二個sales攞去賣左俾佢地,自己咪盞枉作小人,兩頭唔到岸。好喇,佢地入左貨喺會成間執靚先賣的,頭頭尾尾約需四個月,而每件貨基本都賺,個市如果好唔就,唔得咪最多租一年,等等囉,反正大把錢。用『流水作業』四個字就最適合形容佢地。所以不論市好市差佢地都一樣入貨,如果唔入貨,條流水作業線就將會出現真空,幾個月後冇貨賣。第二,就喺佢地辛苦建立的入貨出貨王國,金漆招牌,喺唔破得嘅;你一停左入貨,一件唔要,兩件唔要,三件唔要,啲sales就樹倒胡孫散,唔再搵你。人地一句:『我以為你老人家唔要貨嘛!』,咁點答好呀?

而且如果市弱你又唔買,啲sales點開單,食乜嘢呀?咁即喺有錢就你賺,艱難就我死,仲邊有人尊重你呀?

美孚的物業投資者,著名的還有博客張大朋,由一間自住的美孚單位開始,一間一間地複上去,到九七前清貨,之後再入過,除住宅單位外,更有美孚的舖位。張先生更有多本著作出版,其中一本是《股市投資實戰策略》,筆者看過,可算是樓股雙絕,有興趣的讀者可以看一看。

其實過萬戶的大型屋苑,如太古城、第一城、嘉湖,甚至未來兩萬戶的日出康城,都有一群群這樣的人,與其簡單地視之為炒家,不如視之為小型的產業鍊。經紀賣筍盤給他們,然後裝修單位,再高價放租或放售,對像當然就是局外人,就像打麻雀時「三娘教子」,三家數牌,輸的自然是街外人。

一般市民不應被傳媒報導吸引奢言炒樓,或者輕信樓市見頂爆煲之論,而出售自住物業租樓等跌。如果只是希望置業解決居住問題,在市場低潮時買入乖乖地按時供款,大升浪後有可觀利潤,才去想換樓賣樓加按之類。如果希望投身炒樓一族,但又無御用經紀,又無樓宇化粧團隊,就要看看自己有何條件火中取栗。

 

網誌:http://blog.tokuhon.org
電郵:tokuhon@gmail.com

以上提供資訊僅供參考,不應視為任何投資之建議或邀請,投資涉及風險,應先考慮個人因素,如有疑問請諮詢專業意見。
About 脫苦海 (792 Articles)
業餘投資者,自2002年起在網上連載投資相關文章,著有多本投資及置業類書籍,以數據分析為本,從小業主的觀點,與大家一起透視樓市。 網誌:http://tokuhon.blog
%d bloggers like this: